ਹੁਸ਼ਿਆਰਪੁਰ 09 ਮਾਰਚ (ਬਲਜਿੰਦਰ ਸਿੰਘ): ਸਿਹਤ ਵਿਭਾਗ ਪੰਜਾਬ ਅਤੇ ਸਿਵਲ ਸਰਜਨ ਹੁਸ਼ਿਆਰਪੁਰ ਡਾ ਪਵਨ ਕੁਮਾਰ ਸ਼ਗੋਤਰਾ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਜ਼ਿਲਾ ਟੀਕਾਕਰਣ ਅਫ਼ਸਰ ਡਾ ਸੀਮਾ ਗਰਗ ਵਲੋਂ ਖਸਰੇ ਸੰਬੰਧੀ ਇਕ ਐਡਵਾਈਜ਼ਰੀ ਜਾਰੀ ਕੀਤੀ ਹੈ। ਡਾ ਸੀਮਾ ਗਰਗ ਨੇ ਕਿਹਾ ਕਿ ਯੂ ਐਸ ਏ ਵਿੱਚ ਹੋਈ ਮੀਜ਼ਲਜ਼ ਆਊਟ ਬ੍ਰੇਕ ਅਤੇ ਵੈਕਸੀਨ ਦੀ ਕਮੀ ਨੂੰ ਵੇਖਦਿਆਂ ਵਿਭਾਗ ਵੱਲੋਂ 0 ਤੋਂ 5 ਸਾਲ ਤੱਕ ਦੇ ਬਚਿਆਂ ਦੇ ਮਾਤਾ ਪਿਤਾ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਜੇਕਰ ਉਹਨਾਂ ਆਪਣੇ ਬੱਚੇ ਨੂੰ ਮੀਜ਼ਲ ਦਾ ਟੀਕਾ ਨਹੀਂ ਲਗਵਾਇਆ ਤਾਂ ਉਹ ਆਪਣੇ ਬੱਚਿਆਂ ਨੂੰ ਇਹ ਟੀਕਾ ਜਰੂਰ ਲਗਵਾਉਣ।
ਡਾ ਸੀਮਾ ਨੇ ਕਿਹਾ ਕਿ ਆਪਣੇ ਛੋਟੇ ਬੱਚਿਆਂ ਨੂੰ ਯੂ ਐਸ ਏ ਤੋਂ ਆਉਣ ਵਾਲੇ ਲੋਕਾਂ ਤੋ ਦੂਰੀ ਬਣਾ ਕੇ ਰੱਖੋ। ਕਿਉਂਕੀ ਇਹ ਬੀਮਾਰੀ ਇਕ ਦੂਜੇ ਤੋਂ ਫੈਲਦੀ ਹੈ। ਸੰਕ੍ਰਮਿਤ ਵਿਅਕਤੀ ਦੇ ਉੱਠ ਕੇ ਜਾਣ ਮਗਰੋਂ ਘੰਟਿਆਂ ਤੱਕ ਇਸ ਦੇ ਕੀਟਾਣੂ ਹਵਾ ਵਿੱਚ ਰਹਿੰਦੇ ਹਨ ਜੋ ਦੂਜਿਆਂ ਨੂੰ ਸੰਕ੍ਰਮਿਤ ਕਰ ਸਕਦੇ ਹਨ। ਮੀਜ਼ਲ ਜਾਂ ਖਸਰਾ ਬੱਚਿਆਂ ਦੀ ਬੀਮਾਰੀ ਹੈ ਪਰ ਕਈ ਵਾਰ ਇਹ ਬਾਲਗਾਂ ਨੂੰ ਵੀ ਹੋ ਜਾਂਦੀ ਹੈ। ਇਸ ਵਿਚ ਬੁਖਾਰ , ਲਾਲ ਦਾਣੇ , ਰੈਸ਼ ਅਤੇ ਜ਼ੁਕਾਮ ਵਰਗੇ ਲੱਛਣ ਹੁੰਦੇ ਹਨ। ਗੰਭੀਰ ਰੂਪ ਵਿਚ ਨਿਮੋਨੀਆ ਦਿਮਾਗ਼ ਦੀ ਸੋਜਿਸ਼ ਹੋਣ ਤੇ ਮੌਤ ਵੀ ਹੋ ਸਕਦੀ ਹੈ।
ਮੀਜ਼ਲ ਦਾ ਪਹਿਲਾ ਟੀਕਾ ਬੱਚੇ ਦੇ 9 ਮਹੀਨੇ ਦੇ ਹੋਣ ਤੇ ਅਤੇ ਦੂਸਰਾ ਟੀਕਾ ਡੇਢ ਸਾਲ ਦੀ ਉਮਰ ਵਿੱਚ ਲਗਾਇਆ ਜਾਂਦਾ ਹੈ। ਜਿਹੜੇ ਬੱਚੇ ਦੇ 5 ਸਾਲ ਤਕ ਦੀ ਉਮਰ ਤੱਕ ਇਹ ਟੀਕਾ ਨਹੀਂ ਲੱਗਾ ਉਸ ਨੂੰ ਨੇੜੇ ਦੇ ਸਿਹਤ ਕੇਂਦਰ ਵਿਖੇ ਇਹ ਟੀਕਾ ਲਗਵਾਓ ਅਤੇ ਫੇਰ ਇਕ ਮਹੀਨੇ ਦੇ ਵਕਫ਼ੇ ਪਿੱਛੋਂ ਦੂਜਾ ਟੀਕਾ ਲਗਵਾਓ।ਟੀਕਾ ਲਗਵਾਉਣ ਵੇਲੇ ਮਾਤਾ ਪਿਤਾ ਆਪਣਾ ਆਧਾਰ ਕਾਰਡ ਜਾਂ ਕੋਈ ਵੀ ਆਈ ਡੀ ਪਰੂਫ਼ ਨਾਲ ਲੈ ਕੇ ਆਉਣ ਤਾਂ ਜੋ ਯੂ ਵਿਨ ਤੇ ਉਸ ਦੀ ਐਂਟਰੀ ਕੀਤੀ ਜਾ ਸਕੇ। ਇਸ ਟੀਕੇ ਦੇ ਨਾਲ ਹੀ ਵਿਟਾਮਿਨ ਏ ਦੀ ਖੁਰਾਕ ਪਿਲਾਉਣੀ ਵੀ ਜਰੂਰੀ ਹੈ। ਡੇਢ ਸਾਲ ਦਾ ਟੀਕਾ ਲਗਣ ਉਪਰੰਤ ਵਿਟਾਮਿਨ ਏ ਦੀ ਖੁਰਾਕ ਹਰ ਛੇ ਮਹੀਨੇ ਦੇ ਵਕਫੇ ਨਾਲ ਪੰਜ ਸਾਲ ਤੱਕ ਦਿੱਤੀ ਜਾਣੀ ਜਰੂਰੀ ਹੈ। ਇਹ ਟੀਕੇ ਅਤੇ ਵਿਟਾਮਿਨ ਏ ਸਾਰੇ ਸਰਕਾਰੀ ਸੰਸਥਾਨਾਂ ਵਿਚ ਉਪਲਭਦ ਹਨ ਅਤੇ ਬਿਲਕੁਲ ਮੁਫਤ ਲਗਾਏ ਜਾਂਦੇ ਹਨ।
