ਤਲਵਾੜਾ 21 ਫ਼ਰਵਰੀ, 2026: ਭਾਖੜਾ ਬਿਆਸ ਪ੍ਰਬੰਧ ਬੋਰਡ (ਬੀਬੀਐਮਬੀ) ਦੇ ਫਾਇਰ ਸਟੇਸ਼ਨ ਦੀ ਟੀਮ ਨੇ ਸ਼ੁੱਕਰਵਾਰ ਨੂੰ ਆਪਣੀ ਜਾਬਾਂਜ਼ੀ ਅਤੇ ਤਕਨੀਕੀ ਸੁਝਬੂਝ ਦਾ ਸਬੂਤ ਦਿੰਦਿਆਂ ਇੱਕ ਡੁੱਬਦੇ ਨੌਜਵਾਨ ਨੂੰ ਸੁਰੱਖਿਅਤ ਬਚਾ ਲਿਆ। ਸ਼ਾਹ ਨਹਿਰ ਦੇ ਤੇਜ਼ ਵਹਾਅ ਵਿੱਚ ਕਰੀਬ ਇੱਕ ਕਿਲੋਮੀਟਰ ਤੱਕ ਵਹਿ ਚੁੱਕੇ ਇਸ ਵਿਅਕਤੀ ਦੀ ਜਾਨ ਬਚਾਉਣ ਵਿੱਚ ਫਾਇਰ ਟੀਮ ਦੇ ਕਰਮਚਾਰੀਆਂ ਨੇ ਫਰਿਸ਼ਤਿਆਂ ਵਾਂਗ ਭੂਮਿਕਾ ਨਿਭਾਈ।
ਚੀਖ ਸੁਣਕੇ ਰਾਹਗੀਰ ਨੇ ਦਿੱਤੀ ਸੂਚਨਾ ਪ੍ਰਾਪਤ ਜਾਣਕਾਰੀ ਅਨੁਸਾਰ ਨੇੜਲੇ ਪਿੰਡ ਵਿੱਚ ਮੈਡੀਕਲ ਸਟੋਰ ਚਲਾਉਂਦਾ ਇੱਕ ਵਿਅਕਤੀ ਅਚਾਨਕ ਅਣਨਿਯੰਤਰਿਤ ਹੋ ਕੇ ਨਹਿਰ ਵਿੱਚ ਡਿੱਗ ਗਿਆ। ਪਾਣੀ ਦਾ ਵਹਾਅ ਬਹੁਤ ਤੇਜ਼ ਹੋਣ ਕਰਕੇ ਉਹ ਕੁਝ ਹੀ ਪਲਾਂ ਵਿੱਚ ਕਾਫ਼ੀ ਦੂਰ ਤੱਕ ਵਹਿ ਗਿਆ। ਡੁੱਬਦੇ ਵਿਅਕਤੀ ਦੀਆਂ ਚੀਖਾਂ ਸੁਣਕੇ ਇੱਕ ਰਾਹਗੀਰ ਨੇ ਤੁਰੰਤ ਸੂਝਬੂਝ ਦਿਖਾਉਂਦੇ ਹੋਏ ਬੀਬੀਐਮਬੀ ਫਾਇਰ ਸਟੇਸ਼ਨ ਨੂੰ ਫੋਨ ਰਾਹੀਂ ਸੂਚਿਤ ਕੀਤਾ।
ਸੂਚਨਾ ਮਿਲਦਿਆਂ ਹੀ ਫਾਇਰ ਡਰਾਈਵਰ ਅਰੁਣਦੀਪ ਸਿੰਘ ਨੇ ਆਪਣੀ ਡਰਾਈਵਿੰਗ ਕਾਬਲੀਅਤ ਦਾ ਪ੍ਰਦਰਸ਼ਨ ਕਰਦਿਆਂ ਟੀਮ ਨੂੰ ਚੰਦ ਮਿੰਟਾਂ ਵਿੱਚ ਮੌਕੇ ’ਤੇ ਪਹੁੰਚਾ ਦਿੱਤਾ। ਉਸ ਸਮੇਂ ਤੱਕ ਵਿਅਕਤੀ ਬਹੁਤ ਥੱਕ ਚੁੱਕਾ ਸੀ ਅਤੇ ਉਸਦੀ ਹਿੰਮਤ ਜਵਾਬ ਦੇ ਰਹੀ ਸੀ। ਇਸ ਨਾਜ਼ੁਕ ਘੜੀ ਵਿੱਚ ਟੀਮ ਨੇ ਗਜ਼ਬ ਦੀ ਬੁੱਧਿਮਾਨੀ ਦਿਖਾਈ।
ਲੀਡਿੰਗ ਫਾਇਰਮੈਨ ਦਰਸ਼ਨ ਕੁਮਾਰ ਦੀ ਅਗਵਾਈ ਹੇਠ ਫਾਇਰਮੈਨ ਧੰਨਾ ਸਿੰਘ, ਫਾਇਰਮੈਨ ਜੈਵੀਰ ਅਤੇ ਡਰਾਈਵਰ ਅਰੁਣਦੀਪ ਸਿੰਘ ਨੇ ਨਹਿਰ ਦੇ ਦੋਨੋਂ ਕੰਢਿਆਂ ਦਰਮਿਆਨ ਰੱਸੀ ਦਾ ਵਿਸ਼ੇਸ਼ “ਜ਼ਿਗ-ਜ਼ੈਗ” ਜਾਲ ਤਿਆਰ ਕੀਤਾ। ਜਿਵੇਂ ਹੀ ਡੁੱਬਦਾ ਵਿਅਕਤੀ ਇਸ ਰੱਸੀ ਦੇ ਸੰਪਰਕ ਵਿੱਚ ਆਇਆ, ਉਸਨੇ ਇਸਨੂੰ ਮਜ਼ਬੂਤੀ ਨਾਲ ਫੜ ਲਿਆ।
ਸਟੀਕ ਟੀਮ ਵਰਕ ਨਾਲ ਮਿਲੀ ਕਾਮਯਾਬੀ ਲੀਡਿੰਗ ਫਾਇਰਮੈਨ ਦਰਸ਼ਨ ਕੁਮਾਰ ਦੀ ਯੋਗ ਅਗਵਾਈ ਹੇਠ ਪੂਰੀ ਟੀਮ ਨੇ ਪੂਰੇ ਤਾਲਮੇਲ ਨਾਲ ਰੱਸੀ ਖਿੱਚ ਕੇ ਵਿਅਕਤੀ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ। ਤੁਰੰਤ ਉਸਨੂੰ ਬੀਬੀਐਮਬੀ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸਦੀ ਹਾਲਤ ਨੂੰ ਖਤਰੇ ਤੋਂ ਬਾਹਰ ਦੱਸਿਆ ਹੈ।
ਇਸ ਮੌਕੇ ਲੀਡਿੰਗ ਫਾਇਰਮੈਨ ਦਰਸ਼ਨ ਕੁਮਾਰ ਨੇ ਕਿਹਾ, “ਜਿਵੇਂ ਹੀ ਸਾਨੂੰ ਕਾਲ ਮਿਲੀ, ਸਾਡਾ ਇਕੱਲਾ ਉਦੇਸ਼ ਸਮੇਂ ਸਿਰ ਮੌਕੇ ’ਤੇ ਪਹੁੰਚਣਾ ਸੀ। ਪਾਣੀ ਦਾ ਵਹਾਅ ਤੇਜ਼ ਸੀ ਅਤੇ ਵਿਅਕਤੀ ਹਿੰਮਤ ਹਾਰ ਚੁੱਕਾ ਸੀ, ਪਰ ਸਾਡੀ ਟੀਮ ਦੇ ਸਾਂਝੇ ਯਤਨਾਂ ਅਤੇ ਸਹੀ ਤਕਨੀਕ ਨੇ ਇੱਕ ਪਰਿਵਾਰ ਦਾ ਚਿਰਾਗ ਬੁੱਝਣ ਤੋਂ ਬਚਾ ਲਿਆ।”
ਬੀਬੀਐਮਬੀ ਦੀ ਫਾਇਰ ਟੀਮ ਦੀ ਇਸ ਸਲਾਘਾ ਯੋਗ ਕਾਰਵਾਈ ਦੀ ਇਲਾਕੇ ਵਿੱਚ ਖੂਬ ਪ੍ਰਸ਼ੰਸਾ ਹੋ ਰਹੀ ਹੈ।
